Nəzr haqqında
Nəzr haqqında
Sual: Nəzr nədir?
Cavab: Nəzr – insanın Allah rizası üçün yaxşı bir işi görməsi və yaxud edilməməsi daha yaxşı olan bir işi, Allah rizası üçün tərk etməyi özünə vacib etməsidir.
Sual: Nəzrdə əqd oxunmalıdırmı?
Cavab: Bəli, nəzrdə əqd oxunmalıdır.
Sual: Nəzrdə əqd ərəb dilində oxunmalıdır?
Cavab: Xeyr, əqdin ərəbcə oxunması vacib deyildir.
Sual: Nəzr əqdini necə oxumalıyıq? Missal olaraq qeyd edə bilərsinizmi?
Cavab: Məsələn, “xəstəm sağalarsa, Allah rizası üçün bir fəqirə on manat verəcyəm.”-deyərsə, nəziri düzgün olar. Əgər “Allah üçün filan işi etməy nəzr etdim.”- deyərsə, vacib ehtiyata əsasən, ona əməl etməlidir.
Sual: İnsan Allahın adını zikr etmədən yalnız “nəzr etdim”- deyərsə, nəzri düzgündürmü?
Cavab: Nəzri düzgün deyildir.
Sual: İnsan nəzr əqdində Allah dostlarından birinin adını qeyd edərsə, nəziri düzgündürmü?
Cavab: Nəzri düzgün deyildir.
Sual: İnsan düzgün nəzr edir, lakin nəzrinə əməl etmirsə, vəzifəsi nədir?
Cavab: Günah etmiş olur, kəffarə də verməlidir.
Sual: Nəzr edən şəxsin həddi-büluğ yaşında olması şərtdirmi?
Cavab: Bəli, nəzr edən həddi-büluğ yaşına çatmış, ağıllı olmalıdır və öz iradəsilə nəzr etməlidir.
Sual: Nəzr etməyə məcbur edilmiş şəxsin nəzri düzgündürmü?
Cavab: Nəzri düzgün deyildir.
Sual: Əsəbləşərək iradəsiz şəkildə nəzr edən şəxsin nəzri düzgündürmü?
Cavab: Düzgün deyildir.
Sual: Səfeh (malını mənasız yerlərə xərcləyən) bir şəxs, yoxsula bir şey verməsini nəzr edərsə, nəzrinə əməl etməlidirmi?
Cavab: Nəzri düzgün deyildir.
Sual: Müflis olmuş şəxs, (şəriət hakimi tərəfindən) istifadə etməsinə qadağan qoyulmuş malından, yoxsula bir miqdar verməsini nəzr edərsə, nəzrinin hökmü nədir?
Cavab: Nəzri düzgün deyildir.
Sual: Ərindən icazə almadan, qadının öz malından nəzr etməsinin hökmü nədir?
Cavab: Mübahisəlidir. Bu məsələdə ehtiyat etməlidir.
Sual: Qadının həcc, zəkat, sədəqə, ata-anaya və yaxınlarına ehsan etməsi üçün, ərindən icazə almalıdırmı?
Cavab: Ərinin icazəsinə ehtiyac yoxdur.
Sual: Qadın ərinin icazəsilə nəzr edərsə, sonradan əri onun nəzrini poza bilərmi?
Cavab: Poza və nəzrinin yerinə yetirməsinə mane ola bilməz.
Sual: Övladın nəzr etməsində atanın icazəsi şərtdirmi?
Cavab: Şərt deyil.
Sual: Ata və yaxud ana, şəfqət üzündən ovladlarını etdikləri nəzrdən çəkindirsələr və onlara itaət etməmək incimələrinə səbəb olarsa, nəzrin hökmü nədir?
Cavab: Nəzr batil olur.
Sual: İnsan edə bilməyəcəyi işi nəzr edə bilərmi?
Cavab: İnsan edə biləcəyi işi nəzr etməlidir. Məsələn, piyada Kərbəlaya gedə bilməyəcəyi halda, ora piyada getməyi nəzr edərsə, nəzri düzgün deyildir.
Sual: İnsan nəzr etdiyi zaman, nəzrini yerini yetirmək gücündə olub, sonradan onu yerinə yetirmək imkanında olmasa, nə etməlidir?
Cavab: Nəzri batil olar və ona bir şey vacib olmaz.